பிரித்தானியாவில் ஈஸ்ட் சஸ்ஸெக்ஸ் (East Sussex) பகுதியில் பள்ளிவாசல் ஒன்றின் மீது தீவைப்பு

பிரித்தானியாவின் ஈஸ்ட் சஸ்ஸெக்ஸ் பகுதியில் உள்ள பீஸ்ஹேவன் (Peacehaven) நகரில், சனிக்கிழமை  இரவு பள்ளிவாசல் ஒன்றின் மீது தீவைப்பச் சம்பவம் ஒன்று இடம்பெற்றுள்ளது.  இந்தச் சம்பவம் “வெறுப்புத் தூண்டலுடன் செய்யப்பட்ட தாக்குதல்” எனக் கருதி காவல்துறை விசாரணையை ஆரம்பித்துள்ளது.

சம்பவம் எப்படி நடந்தது?

அந்நாட்டு காவல் துறையின் அறிக்கையின் படி, அக்டோபர் 5 ஆம் திகதி இரவு 10 மணியளவில், பீஸ்ஹேவன் நகரில் அமைந்துள்ள ஒரு பள்ளிவாசலின் பிரதான நுழைவாயிலில் தீவைக்கப்பட்டது. பள்ளிவாசல் வாசலில் நிறுத்தப்பட்டிருந்த கார் எரிந்து நாசமாகியதோடு, கட்டிடத்தின் முன்புறமும்  சேதமடைந்தது.

சிசிடீவி காட்சிகளில், முகமூடியணிந்த இரண்டு நபர்கள் பெட்ரோல் ஊற்றி தீவைப்பது பதிவாகியுள்ளது. குறுகிய நேரத்தில் தீ பரவிய நிலையில், தீயணைப்பு படையினர் விரைந்து வந்து தீயை கட்டுக்குள் கொண்டுவந்துள்ளனர்.

உயிர் சேதம் இல்லை – ஆனால் சமூகத்தில் அச்சம்

இச்சம்பவத்தில் உயிரிழப்புகள் எதுவும் ஏற்படவில்லை என்றாலும், அப்பகுதி மக்கள் மிகுந்த அச்சத்தில் உள்ளனர். 

ஈஸ்ட் சஸ்ஸெக்ஸ் காவல்துறை, “இது ஒரு குற்றச் சம்பவமாக மட்டுமல்ல, மதவெறி மற்றும் இனவெறி தாக்குதலாகக் கருதப்படுகிறது” என்று அறிவித்துள்ளது. விசாரணை தீவிரமாக முன்னெடுக்கப்பட்டு வருவதோடு, சம்பந்தப்பட்ட சிசிடிவி காட்சிகள் சேகரிக்கப்பட்டு வருவதாகவும் பொலிஸார் தெரிவித்துள்ளனா்.

முஸ்லிம் சமூகத்தின் நிலை

பிரித்தானிய முஸ்லிம் கவுன்சில் (Muslim Council of Britain) தனது அறிக்கையில், “இந்த சம்பவம், சமீபகாலமாக அதிகரித்து வரும் இஸ்லாமோபோபிய தாக்குதல்களின் ஓர் உதாரணம்” எனக் குறிப்பிட்டுள்ளது. மேலும், பள்ளிவாசல்களுக்கு கூடுதல் பாதுகாப்பு வழங்க வேண்டும் என்று அந்த அமைப்பு அரசாங்கத்திடம் கோரிக்கை விடுத்துள்ளது.

பின்னணி கவலைகள்

கடந்த சில ஆண்டுகளில் பிரித்தானியாவில் பள்ளிவாசல்களுக்கு எதிரான வெறுப்பு தாக்குதல்கள் அதிகரித்து வருவதாக சமூக அமைப்புகள் எச்சரிக்கை விடுத்துள்ளன. மத அடிப்படையிலான வன்முறைகள் சமூக அமைதிக்கே பெரிய அச்சுறுத்தலாக இருப்பதாக அவை கூறுகின்றன.